Nmi ‑sea' i ‑kwɛ ke, -jɩ ‑kwɛai 'a kɛ'
11
Nyɔsoa wlu' 'de Moisɩ ke Aarɔn ‑pee ɛ 'na: 2 Ao wlu 'de Israɛ -nyʋ ‑pee ao 'na: 'De nmi "klein ‑ɩa na 'de 'blʋa "kpei ɛ, ‑jɩ ao 'jea 'di ɩ ka: 3 Ɩa' ‑jɩ ‑ɩa kɔfa" sʋan 'fɔ, ‑wɛe ‑ɩa ja dɩ ɩ mla de -wɛe -ɛɛ tɩ ao bɛɛ' ao 'jɩ di.4 'De nmi -bo ɩ mla dɩ -ɩa jɩ de -wɛe ɩa tɩ, 'dewlɛ -jɩa kɔfa" sʋan 'fɔo "klu, -jɩ ao sea dii ɩ ka: -sɛn "kpei "soo- -ɛɛ mla dɩ -ɛɛ jɩ de -wɛe -ɛɛ tɩ, 'kaa ɛɛ' kɔfa" se 'fɔo sɔn-, ɛ se i -kwɛ 'de aoa' -tɩ' 'ʋn. 5 Wla, -ɛɛ mla dɩ -ɛɛ jɩ de -wɛe -ɛɛ tɩ, 'kaa -ɛ sea kɔfa" 'ble, ɛ se i -kwɛ 'de aoa' -tɩ' 'ʋn. 6 Kewlɛ ‑koo' "kpei ‑gblɛɛ -ɛɛ mla dɩ -ɛɛ jɩ de -wɛe -ɛɛ tɩ, 'kaa -ɛ sea kɔfa" 'ble, ɛ se i -kwɛ 'de aoa' -tɩ' 'ʋn. 7 "Be, -ɛɛ kɔfa" sɔn 'fɔo 'kaa -bo -ɛ mla dɩ -ɛɛ' jɩ de ɛɛ tɩ ɛ se i -kwɛ 'de aoa' -tɩ' 'ʋn. 8 Ao se ɩa' nmi dii, ao se ɩa' "ku mɔɔ ‑cɛ" "i blai, ao ‑gbʋn ɩ ja, ka dɩ ‑sea' i ‑kwɛ nɩa.
9 Ao bɛɛ' ao 'je -smii'- "klein ‑nɩa 'de 'tɔniɛ o, "ni ‑gbuu ‑sɔn, ‑wɛe ‑ɩ ‑nɩa 'kwɩn kwii, 'de ‑ɩ ‑blea doun" 'a 'kwɩn di. 10 'Kaa -jɩ sea doun" 'a 'kwɩn 'ble, 'de ‑ɩ sea 'kwɩn kwii nɩɛ-, ‑wɛe ‑ɩ ‑jia" 'tɔniɛ ke, "ni ‑gbuu ‑sɔn i, ao ‑fuun‑ ‑mɩ nyai. 11 Ɩ nɩ aoa' nyai ‑fuun ‑dɩ, ao sɩ dii, ‑wɛe ao 'je ɩa' "ku mɔɔ' ‑cɛ" nyai ‑fuun ‑ke. 12 Nmi "klein ‑ɩ ‑nɩa 'e "ni ‑sɔn, ‑wɛe ‑ɩ sea doun" 'a 'kwɩn 'ble, 'de ‑ɩ sea 'kwɩn kwii nɩɛ, nɩ aoa' nyai ‑fuun ‑dɩ.
13 Nʋɩ- ‑ɩ ‑jea aoa' nyai ‑fuun ‑dɩ nɩ, ‑wɛe ao sea dii ɩ ka: ‑Cii" o, ‑tua ke ɛɛ' "kwli -wee' ke-, 14 milana ke, ‑cii" okaan ke ɩa' "kwli -wee' ke-, 15 "wan ke ɛɛ' "kwli ‑wee' ke-, 16 ‑gbɛkɛ' ‑tu, kwii", "niɔboun-, ɩ ke kaan ke ɛɛ' "kwli ‑wee' ke-, 17 ‑poo' ke, ‑doundoki' ke ɛɛ' "kwli ‑wee' ke-, 18 kwii", ‑panawɛ ke ɛɛ' "kwli ‑wee' ke-, 19 tɔplu ke, -sa "sri "niɔ- ke ɩa' "kwli ‑wee' ke-, kou", taʋn'-.
20 Aoa muɛ "kɩ "klein -ɩ -blea nai- -wɛe ‑ɩa naa bɩ -nyiiɛ' "kpei nya ‑fuuan', 21 'kaa ‑jɩ ‑blea bɩ ‑wɛe ‑ɩ -bɩɩ' kwa wɛi ‑tea ɩ 'jea ‑plin" ɛ. Ao bɛɛ' ao 'je ‑mɩ di. 22 Ɛmɛ ‑tɩ ao bɛɛ' ao 'je 'plaɩn ‑too'-, kpɔnwɔn", ‑klɩan", ɩa "kwli ‑wee' "klein di. 23 'Kaa "kɩ "klein ‑jɩ ‑siae', ‑wɛe ‑ɩ ‑blea nai 'de ‑ɩa naa bɩ -nyiiɛ' "kpei, ao ‑fuun ‑mɩ nya.
24 Ɩa' nmi tu a muɛ nʋa' ao se i ‑kwɛ i, ‑bo ao blɛ ɛɛ' "ku "i, ao se i ‑kwɛ i mamaʋ 'sʋ kwie 'je kpʋn. 25 Nyɔ "oo nyɔ ‑ɔɔ mua ɛɛ' "ku 'blea, ɔ 'je ɔɔ' "wliiɛ‑ wɔɔ-, ‑wɛe ɔ se i ‑kwɛ i mamaʋ 'sʋ kwie 'je kpʋn-. 26 Nmi ''oo nmi ‑ɛɛ kɔfa" sea fɔ sɔn, ao ‑gbʋn ‑mɩ ja, ka dɩ ‑sea i ‑kwɛ nɩa, ɩ ke ‑jɩ ‑ɩa ta dɩ -ɩa mlɩ -wɛe -ɩa' jɩ de, nyɔ "oo nyɔ ‑ɔɔ mu "i blaa', ɔ se i ‑kwɛ. 27 Nmi "klein ‑ɩa naa bɩ -nyɩɛ "i ɛ, ‑mɩ se i ‑kwɛ 'de aoa' ‑tɩ' 'ʋn. Nyɔ "oo nyɔ ‑ɔɔ mu ɩa' "ku "i blaa', ɔ se i ‑kwɛ i mamaʋ 'su kwie 'je kpʋn. 28 Nyɔ ‑ɔɔ mua ɩa' "ku 'blea, ɔɔ muɛ ɔɔ' "wliiɛ wɔɔa', ‑wɛe ɔ se i ‑kwɛ i, mamaʋ 'sʋ kwie 'je kpʋn. Ao ‑gbʋn ɩa' nmi tu ja, ka dɩ ‑sea i ‑kwɛ nɩa.
29 Nmi mɩɩ" ‑ɩa plea 'blʋɔ woi, ‑wɛe ao 'jea ja ‑gbʋn ka dɩ -sea i -kwɛ nɩa ɩ ka: Tɔpʋ o, ‑poɛn o, ‑tɔɔn" "kwli ‑wee' ke, 30 'Kle -gbʋnde' ke ɛɛ' "kwli -wee' ke-, -kliba ‑tɔɔn" ke ɛɛ' "kwli -wee' ke-, ‑seekʋʋ' o. 31 Ɩa' nmi tu ‑ɩa plea 'blʋɔ woi ‑nɩ, ɩ se i ‑kwɛ 'de aoa' ‑tɩ' 'ʋn. Nyɔ "oo nyɔ ‑ɔɔ mu "i blaa', ‑bo ɩ mɛ mɔɔ' ‑cɛ" mɔ 'de ɛ, ɔ se i ‑kwɛ mamaʋ 'sʋ kwie a jea kpʋn. 32 Dɛ "oo dɛ nmi ‑nɩa 'mʋʋa‑ 'a "ku a mua "kpei blua', ɛ se i ‑kwɛ, ‑bo ɛ nɩ dɩfoe" ʋʋ nʋa tu 'ʋn o, ‑bo ɛ nɩ "wliiɛ o, ‑bo ɛ nɩ nmi ku o, ‑bo ɛ nɩ ‑ke o, dɛ "oo dɛ ɛ nɩ, nyɔ ɔ nʋa dbo 'ʋn o, nyʋ 'jeɛ wɔɔ‑, ɛ se i ‑kwɛ i mamaʋ kwie 'je kpʋn ‑wɛe ɛ 'je i ‑kwɛ. 33 ‑Bo ɩa' nmi mɩɩ" tu 'a jrɛ' 'mɛ, ‑wɛe ɛ 'je maa dɛjrɛ' di blu ɛ, dɛ "klein ‑nɩa 'de ɛ 'di 'mʋʋa‑ se i ‑kwɛ, ‑mɛ ao wa ɛɛ' dɛfoo" tu. 34 ‑Bo nyʋ 'wla "ni ɛ ‑nɩa 'e dɛfoo" ‑nɩa 'mʋʋa‑ 'di 'de diidɛ "kpei ɛ, ‑mɛ ɛɛ' diiɛ tu se i ‑kwɛ, 'kamɔ ɛ nɩ 'de dɛ "klein ‑nɩa 'naadɛ 'ɛ ‑tɩ' 'ʋn ‑ke, ka dɛfoo" ‑ɛ 'di ɛ nɩa -mɛ nɩ mɔɔ' ‑cɛ" mɔ de ɛ. 35 Dɛ "oo dɛ ɩa' nmi tu 'a "ku a mua "kpei blua' a, ɛ se i ‑kwɛ, ‑bo ɛ nɩ 'fuu- o, ‑bo ɛ nɩ ‑klɩan o, nyɔ ɔ muɩ i waa', dɛ dɛ‑nʋɛ' mɛ ‑nɩ ɩ se i ‑kwɛ, ‑wɛe 'kamɔ ao jɩ ja ‑gbʋn ‑ke. 36 -Bo ɩ blu 'de ‑tuu" ni o, ni bi 'di o, "ni a ‑teea' ‑mɩ 'dii ɛ, ‑mɩ ‑kwɛ i, 'kaa nyɔ ‑jɔɔ mua ɩa' "ku "i blaa' 'de "niɔ -mɔ se i ‑kwɛ. 37 ‑Bo ɩa' "ku blu 'de doodɛ "kpei ɛ, ‑mɛ ‑kwɛ i. 38 'Kaa ‑bo nyʋ po "ni 'de doodɩ 'a 'jɔ "kpei ɛ, ‑wɛe ɩa' jrɛ' 'ɛ "ku 'jee blu ɛ, ‑mɛ ao ‑gbʋn ɛ ja, ka dɛ ‑sea i ‑kwɛ nɩa. 39 ‑Bo nmi ‑jɛ aoa dia 'mɛɛ ɛɛ' -cɛ" -pee ɛ, nyɔ ‑ɔɔ mua ɛɛ' "ku "i blaa', ɔ se i ‑kwɛ mamaʋ 'sʋ kwie 'je kpʋn. 40 Nyɔ ‑ɔɔ mua ɛɛ' nmi dia', ɔɔ muɛ ɔɔ' "wliiɛ wɔɔa', ‑wɛe ɔ se i ‑kwɛ i mamaʋ 'sʋ kwie 'e kpʋn-, 'kamɔ ɛ nɩ 'de nyɔ ɔ mua ɛɛ' "ku 'blea 'a -tɩ' 'ʋn ke-. 41 Ao ‑fuun nmi mɩɩ" ‑ɩa cniia 'blʋɔ woi nyai, ao 'bʋɩ di ɛ. 42 ‑Bo ɛɛ sea ‑pɛɛ' cniiɛ mɔ 'deɛ, ‑bo ɛɛ sea bɩ -nyiiɛ' "kpei mɔ naa 'de ɛ, 'de ‑bo ɛ 'ble bɩ ‑tuu" mɔ 'de ɛ, dɩ "klein ‑ɩa cniia ‑pɛɛ', ao sɩ ɩa' jrɛ' dii, ‑wɛe ao 'jɩ nyai ‑fuun‑. 43 Ao 'bo nʋɛ nyʋ 'bo aopʋ nyai ‑fuun ɛ, 'de nmi ‑ɩa cniia ‑pɛɛ' 'mʋʋa‑ ao 'bo aoa' ‑cɛ" ‑flɛn" kpʋʋn ɛ 'de ɩa ‑tɩ' 'ʋn, 44 dɛ ‑nʋɛ 'mɔ Nyɔsoa, 'mɔ ‑nɩ aoa' Kea. Ao nɩ 'pepe, dɛ dɛ‑nʋɛ' ɛ mɛ ‑nɩ 'ɩn ‑kwɛ i, ao 'bo aoa' ‑cɛ" ‑flɛn" kpʋʋn ɛ 'de nmi ‑ɩa cniia ‑pɛɛ' 'mʋʋa‑ a jrɛ' 'ɛ ‑tɩ' 'ʋn. 45 Dɛ-nʋɛ' ɛ 'mɔ ‑nɩ Nyɔsoa, ‑ɔ ‑sa aopʋ‑ 'de Esipʋ, ‑wɛe 'ɩn 'je aoa' Kea nɩ. Ɛɛ' -tɩ' 'ʋn ao ‑kwɛ i dɛ dɛ‑nʋɛ' mɛ ‑nɩ 'mɔ ‑kwɛ i. 46 Kɛ' ‑blaa 'de nmi ‑a naa bɩ -nyiiɛ' "i o, nʋʋɩ o, ‑wɛe -jɩ ‑nɩa 'de "ni ‑sɔn ke, ‑jɩ ‑ɩa cniia ‑pɛɛ' 'a ‑tɩ' 'ʋn ɛ -nao, 47 ‑wɛe ‑bo ɛ nɩ 'kan 'de nyʋ 'je nmi ‑sea i ‑kwɛ ke, ‑jɩ ‑kwɛai 'a "kpei ‑seea' ka juo, ‑wɛe nmi nyʋ 'jea 'di ke, nyʋ sea dii 'a "kpei ‑seea' ka juo.